KRONIKA: Hiru mosketeroek, zazpi ipotxek eta Hamelingo trikitilariek gustura eta libre kantatu zutenekoa...

Oiongo saioak askorako eman zuen. Zalduondotarrak etorri ziren bisitan eta txandriotarrok harrera ezin hobea egin genien. Arabako Errioxako altxorrak erakutsiz hasi genuen eguna: Olioa eta ardoa. Trujalera egindako bisitan olioa nola ekoiztu eta baita dastatzeko aukera izan genuen eta ondoren upategira bisita ederra, bertoko ardoarekin gozatuz. Plazan triki-poteo txikia egiteko aukera ere izan genuen.

14:30tan Azkenak elkartean zen hitzordua. Bertan berrogei bat lagun mahai bueltan Oiana triki band-aren doinuekin gozatuz hasi zen bertso-festa. Idatzizkoari dagokionez, “Ran Roberran” doinuan gazteok boteioiarekin dituzten komeriak kantatu zituzten: “Boteioia popopopopo!!”

Alaznek jarri zituen lanean bertsolariak. Hasierako agurren ostean, Txandrio hirukotea eta Zalduondoko zazpikotea ederto ibili ziren ofizioetan: watxapa, hipotekak, San Valentin eguna... hainbat kolpe eta bertsoekin gozatzeko parada izan zuen bertsozaleak.

Ofizioen ostean, puntu-erantzunak eta bukaera emandako ariketetan ere ale politak entzun ziren bazkalosteko giroan. Hitza emandako lanetan, aipatzekoa da Irati Ruiz de Pinedok olioari botatako bertso ederra.

Saioaren bukaeran “Egun da Santimamiña” doinuan taldeka egindako kopla saioan txandriotar hirukotea Vatikanora bidean autoa matxuratuta zuten hiru moja izanik, aukera eman zitzaion bertsozaleari irriren bat edo beste egiteko. Bukaerako agurra kolektiboa izan zen: “Txanketeren” doinuan bertsolari bakoitzak kopla bina kantatu eta bertan egunak emandako zoriona eta esker ona izan zen hizpide, ahaztu gabe, Jagoba eta Iker plazetan libre nahi ditugunaren aldarrikapena...

Hauxe izan zen egunak eman zuena, txandriotarrak Zalduondorako bisita hitzartuta amaiera ezinhobea duen ipuin klasikoa izan zen. Hiru mosketeroek, zazpi ipotxek eta Hamelingo trikitalariek gustura lo egiteko beta izan zuten eta bertsozaleak bertso-ipuin-saioa ikusi, entzun eta goxatzeko tenorea izan zuen, etxe giroan, sutondoan, amamak kontatzen zizkigun ipuin horien antzera.

Eta hau hala bazan ala ez bazan...

Arabako bertso kuadrilla artekoA...hasi da eta badator

Hasi da "Arabako bertso kuadrilla artekoa"...otsailean hasi eta apirilaren 5raino hainbat taldek parte hartuko dute bertan eta Arabako Errioxari dagokionez Txandrio bertso eskolak bat-bateko taldean eta gure lagunminak diren Oiana trikiti taldeak idatzizkoetan parte hartuko dute.

Hiru data izango dira garrantzitsuak gureari dagokionez:

Otsailak 15 larunbata, Oion: bertso bazkaria - Txandrio vs. Zeledonen seme-alabak (Zalduondo) + Oiana
Otsailak 22 larunbata, Gasteiz: bertso-poteoa - Aizkorak Zorroztu (Gasteiz) vs. Txandrio
Apirilak 5 larunbata, Agurain: Final Handia - Talde guztiek parte hartuko dugu egun osoko festa giroan.

Otsailaren 15rako dena prestatzen gabiltza, zu zeu, bertsozale falta zara...animatu eta parte hartu gurekin hitzaren kirol nazionalean, errimen zirimolan, euskaratik eta euskaraz, hitza jolasa bihurtu den honetan!!

Otsailak 15 larunbata BERTSO-BAZKARIA Oiongo Azkenak elkartean, 14:30tan.
15 €, gazteak: 8 €. Izena emateko 600083476

Bat-bateko taldeak: Txandrio - Arabako Errioxa eta Zeledonen seme-alabak – Zalduondo
Idatzizko taldea: Oiana Triki Band Sound

(Oharra): Zalduondoko taldeak autobus bat jarriko du joan eta etorri egiteko. Info gehiago 615 758 844 Antolatzailea: Txandrio - Arabako Errioxa

Txandrio bertso taldea + Oiana:
Orlando Arreitunandia, Iker Olabarrieta, Unai Bengoetxea, Edurne Azkarate, Endika Sarabia, Arantxa Sobrino, Alazne Garcia, Mikel Fernandez de Arroiabe, Ibai Roitegi, Idoia Marauri, Uxue Fernandez-Andes, Virginia Eusebio eta Julen Zabala

Informazio gehiago: http://www.bertsozale.com/eu/araba/bertso-kuadrilla-artekoa

Zer gara gu? Nor gara gu? Txandriotarrak gara gu.

Azaroaren 29an euskararen nazioarteko eguna ospatuko da Oionen

Datorren ostiralean euskararen nazioarteko eguna dela eta ospakizun bateratua burutuko da Oionen. Egitarauaren baitan bertso-kantu afaria ospatuko da igerilekuetako tabernan, iluntzeko 22:00ak aldera. Bertsogintzari dagokionez Felipe Zelaieta eta Asier Otamendi izango ditugu kantari. Animatu eta 20 euroren truke sekulako giro ederraz eta saio ahaztezinaz gozatzeko aukera izango duzue.

Afarian izena emateko: Telefonoz: 945 601087 (IKA Errioxa) edo bertan: Oiongo San Bizente ikastolan, Oiongo Ramiro de Maeztu eskolan, IKA euskaltegian eta igerilekuetako tabernan.

Informazio gehiago: http://www.euskaramaitedut.com/

Ikusi Euskararen Egunerako prestatutako bideoa!

ESKERRIK ASKO BIHOTZ-BIHOTZEZ!!

Pasa berri den urria hilabete oso garrantzitsua izan da Arabako Errioxako bertsogintzarako. Aste gutxitan bertsogintzaren inguruan hamaika ekimen izan ditugu gurean. Txandrio bertso-eskolako kideok, Arabako bertsozale elkarteko lagunek, Txapelketa Nagusiko antolatzaile taldeak eta eskualdeko hainbat euskaltzaleok egin duten ahalegina itzela izan da...

Aipatu bezala, urriaren 11an Oionen izan genuen bertso-poteoa. Bertan, urriaren 26rako iragarrita zegoen saiorako gonbitea luzatzea zuen helburu. Bost bertsolari izan ziren kantari eta 30 bat lagun tabernaz-taberna adi-adi entzuten: Arrate Illaro, Sebastian Lizaso, Unai Bengoetxea eta Iker Olabarrieta izan genituen koplatan. Halere, beterana gazte bat ere "espontanea" gisa animatu zen: Edurne Azkarate. "Exzedentzian" zegoela eta ez zegoela Lizaso ibili zen bere atzetik xaxatzen eta azkenean Edurnek erantzun. Txandriotarroi dagokionez, hotz samar hasi arren, saioa aurrera joan ahala bere mailara hurbiltzen hasi ziren, Damas tabernan txapelduna nor izango ote zen mintzagai izanik ale politak utziz. Garai tabernan agurren txanda zela eta zortziko handian ibili ziren elkarri eskerrak emanez.

Urriaren 17an, berriz, IKA euskaltegiarekin elkarlanean Ruben Sanchez bertsolariak saio didaktikoa eskaini zuen Txapelketa Nagusiko kontuak aitzakia hartuta. Hamabost lagunen aurrean primeran azaldu zuen Oiongo saioan izango ziren gora-beherak.

Eta azkenean egun handia iritsi zen: eskerrik asko urriaren 26a data ahaztezina bezain hunkigarria egiteagatik. Zazpiehun lagun bueltan izan ginen Arroio I frontoian "hitzaren kirol nazionalaz" gozatzen, non eta Arabako Errioxan... Eskerrik asko bertsozale, Oiongo herriko plaza, egun batez behintzat, erabat euskaldun bihurtzeagatik. Ahaztu gabe, noski, errimekin gozarazten artistak diren sei bertsolari handiak ere, estimatua dago.

Eta ez gara nekatuko eskerrak emateaz ametsak egia bihurtu duzuen guztioi... eskerrik asko bihotz-bihotzez.

 Zailtasunak zailtasun, Txandrio bertso eskolako kideontzat bultzada handia izan da aurrera egin dezagun. Plazan edo bertso-afariren batean elkar ikusiko dugulakoan, laster arte!!

Saioari buruzko informazio gehiago:
http://www.bertsozale.com/oion

Datorren larunbatean bertsozale guztiok Oionen izango dugu zita

Eta badator txapelketa gurera, Arabako Errioxara. Seigarren kanporaketa Oionen ospatuko da. Saio honetan finalaurrekoetara nortzuk pasako diren erabakiko da. Txapelketa pil-pilean dago eta txandriotarrok poz-pozik larunbatean izango dugun saioarekin. Arabar bat kantari izango da: animo Manex!! Beraz, badakizue...zatozte, giro ezinhobea izango baita Arroio I frontoian. Saioa 17:30etan hasiko den arren, 16:30tatik aurrera ateak irekiko dira.

 

informazio gehiago: bertsozale elkartea

Arabako Errioxako bertso agenda: badator txapelketa!!

Ikasturtea inoiz baino fuerteago hasi dugu. Urria potente-potente eta Arabako Errioxa bertsozaletzeko gogoekin.

Hasteko urriaren 11an Oionen bertso-poteoa izango dugu txapelketa girotzeko aitzakian: Egaña iragarrita zegoen arren, data erratze bat dela medio, bere ordez, Sebastian Lizaso ekarriko dugu gurera. Arrate Illaro bizkaitarra ere Oionera dator eta txandriotarrok ere bertan kantari izango dira bi bertsolari "handi" hauengandik ikasteko eta gozatzeko gogoz. Hau guztia iluntzeko 19:30tan plazatik abiatuta eta Oiana trikiti taldeak girotuta izango da.

Urriaren 14an, berriz, bertso-eskolaren aurkezpena egingo dugu arratsaldeko 18:30tan Oiongo IKA euskaltegian. Animatu, faborez... harrobia behar dugula...animo gazteak!!

Ostegunean, urriaren 17an, Ruben Sanchez izango dugu Oiongo Bazterra aretoan bertso-saio didaktiko bat eskainiz: bertan txapelketaren nondik norakoak, ofizioak, puntuatze-sistemak eta abar hamaika adibideekin azalduko ditu.

Eta noski, galdu ezin den zita urriaren 26an izango da Oiongo Arroio I frontoian. Arratsaldeko 17:30tatik aurrera Txapelketa Nagusiko seigarren kanporaketa ospatuko da. Finalerdietarako txartelak zein bertsolarik eskuratuko dituen erabakiko duen saioa, hain zuzen. Eneritz Zabaleta, Etxahun Lekue, Maddi Sarasua, Miren Amuriza, Iratxe Ibarra eta Manex Agirre izango dira kantari.

Buf!! Eta bukatzeko azaroaren 2an Eskuernagan Bertxoko sariketaren saio bat ospatzeko prestaketan gabiltza, baina hori txapelketa nagusiko "ajea"ren ostean kontatuko dizuegu zehatz-mehatz... lagunok hitzen zirimola dantzan dugu jada, has dadila festa, jaia, jarana eta txandrioa... euskaratik eta euskaraz...