Eta horrela, poliki-poliki, joan gara aurrera. Kide berriak inguratu dira bertso eskolara,hala nola, Endika, Edurne, Beñat, Uxue, Iker, Unai, Mikel, Julen, Arantxa, Alazne… eta martxa hartu dugu. Asmoa edo ametsa izan zitekeena egun erreala da. Gaur egun, lan-talde majoa dago bertso eskolaren inguruan. Batzuk bertsoak sortzen eta beste batzuk bertso idatzian, gai-jartzaile lanetan, argazkilari, soinu teknikari, antolakuntzan eta egunero sortzen diren hamaika erronkari elkarrekin eta auzolanean aurre eginez.
Aurtengo ikasturtean erronka berriak ditugu, txandriozale berriak eta bertsolaritza Arabako Errioxako txoko berrietara zabaltzeko gogoa. Asteazkenero 18:30tan Oiongo IKA euskaltegian elkartzeko ohitura dugu, beraz, txandriotarra edo txandriozalea izan nahi baduzu badakizu nora jo.
No hay comentarios:
Publicar un comentario